- Laba nin baa wada socdaalay. Wadadii ay haysteen ayaa meel xidh ah la gashay. Iyaga oo xidhkii dhex socda, ayaa waxa ku soo baxay libaax. Labadii nin mid baa markiiba cararay oo geed dheer fuulay. Kii kale, oo aan weli halkiisii ka dhaqaaqin, ayaa libaax ku soo dhowaaday. Ma carari karo, geed ma kori karo, libaaxa uma jilib dhigi karo. Wuxu tab iyo xeelada si degdeg ah u raadshoba, wuxu talo ku gaadhay inuu jiifsado oo mayd iska dhigo. Markuu jiifsaday ayaa libaaxii dul yimi. Ninkii, oo dhaqaaq daayay, oo neeftii isku dhejiyay, oo bakhti iska dhigay, ayaa libaax dhowr jeer ursaday. Libaaxi inuu ninki bakhti yahay ayuu u qaatay. Libaaxuna bakhatiga ma cuno. Sidaa darteed libaaxi nikii jiifay wuu ka tegay.
Ka dib markuu libaaxi fogaaday oo kayntii dhex galay, ayaa ninkii geedka dheer fuulay soo degay oo u yimi kii dhulka jiifay oo sare fadhiya. Wuxu weydiiyay, “Libaaxi waa kii kula xanshashaqaye, muxuu dhegta kuu saaray?” Ninkii jiifsaday wuxu ugu jawaabay, “Libaaxi wuu ila taliyay.” Isaga oo yaabsan ayuu ku yidhi, “Oo muxuu kugula taliyay?” “Wuxu igula taliyay in aanan jid la marin nin marka halis ka hortimaado carara!!!”
W/q: Prof, C/salaam Yaasiin
No comments:
Post a Comment